प्रेमात पडल्यावर...

स्वप्नांच्या गावी जाणं,
आता रोजच होत असतं.
जागेपणी देखील आता,
स्वप्नांतच जगणं असतं.
बहुतेक प्रेमात पडल्यावर,
हे असंच होत असतं.

रात्र रात्र जागणं,
आता नेहमीचं झालेलं असतं.
तिच्याबद्दल चांदण्यांना सांगणं,
आता सवयीचं झालेलं असतं.
बहुतेक प्रेमात पडल्यावर,
हे असंच होत असतं.

मन माझं सारखं,
आता उधाणलेलं असतं.
वार्‍यावरती ते सारखं,
आता बेभान उडत असतं.
बहुतेक प्रेमात पडल्यावर,
हे असंच होत असतं.

कडाक्याची थंडी देखील,
आता गुलाबी वाटत असते.
शहारलेल्या जीवाला,
तिची उणीव भासत असते.
बहुतेक प्रेमात पडल्यावर,
हे असंच होत असते.

सकाळ, संध्याकाळ मन फक्त,
तिच्याच विचारात गुंतलेलं असतं.
आठवणींच्या कवडस्यात फक्त,
तिच्याच प्रेमाचं चांदणं असतं.
बहुतेक प्रेमात पडल्यावर,
हे असंच होत असतं,
हे असंच होत असतं...